"გაუქმდეს თუ არა სრულიად გამოცდები, ალბათ, ამაზე საუბრის გაგრძელება არც ღირს, უპრიანი არ იქნებოდა გადავადებაც"

"გაუქმდეს თუ არა სრულიად გამოცდები, ალბათ, ამაზე საუბრის გაგრძელება არც ღირს, უპრიანი არ იქნებოდა გადავადებაც" - მაია მიმინოშვილი

განათლება - 19:55, 01 May, 2020

4008

გაუქმდეს თუ არა სრულიად გამოცდები და ყველა მსურველი ჩაირიცხოს უმაღლეს სასწავლებელში, ალბათ ამაზე საუბრის გაგრძელება არც ღირს - ამის შესახებ მაია მიმინოშვილმა „პალიტრანიუსის“ გადაცემაში „საღამოს ნიუსრუმი“ განაცხადა.მაია მიმინოშვილის თქმით, არ იგეგმება არც გამოცდების გადავადება, რადგან არავინ იცის რა მოხდება მომავალში.
„საუბარია იმასთან დაკავშირებით, გაუქმდეს თუ არა სრულიად გამოცდები და ყველა მსურველი ჩაირიცხოს უმაღლეს სასწავლებელში, ალბათ ამაზე საუბრის გაგრძელება არც ღირს და დამეთანხმებით, რომ ეს ნამდვილად არ იქნება გამართლებული, თუნდაც იმ მიზეზის გამო, რომ ძალიან ბევრი მცდელობა იყო იმასთან დაკავშირებით, რომ სასწავლო პროცესი არ ჩავარდნილიყო, შემოღებულ იქნა ე.წ ონლაინკურსები და სასწავლო პროცესები ონლაინ რეჟიმში მიმდინარეობს და არ გამოცხადდა აკადემიურ წლად, რაც ნამდვილად ძალიან სწორი გადაწყვეტილებაა. ბუნებრივია, უმაღლეს სასწავლებლები ისევ ელოდებიან სტუდენტებს, მათ უნდა განაახლონ ეს პროცესი, როგორიც არ უნდა იყოს რეალობა მომავალში და ამ აბიტურიენტებს ნამდვილად სჭირდებათ შერჩევის კონკრეტული სისტემა. ახლა არანაირი დრო არ არის იმის, რომ ახალ სისტემაზე დაიწყოს სამინისტრომ ფიქრი, მე ლოჯისტიკურ ნაწილს ვგულისხმობ. გამოცდების გადავადებაც უპრიანი არ იქნებოდა იმიტომ, რომ ჯერჯერობით არ ვიცით მომავალში როგორ იქნება ვითარება. ღმერთმა ქნას ყველაფერმა მშვიდობიანად ჩაიაროს, მაგრამ როგორც სპეციალისტები გვეუბნებიან, ნუ შევიქმნით იმის ილუზიას, რომ კორონავირუსი დამარცხდება ივლისში, აგვისტოში ან სექტემბერში. ბუნებრივია, ბევრ რამეს შეუშლის ხელს გამოცდების გადავადება და მეორე მხრივ, ეს არ არის გამოსავალი“, - განაცხადა მაია მიმინოშვილმა.