“დამოუკიდებელ პოლიტიკურ ექსპერტთა ასოციაციის“ თავმჯდომარემ - გელა კვაჭანტირაძემ ხელისუფლების წარმომადგენლებსა და ოპოზიციას შორის მარნეულში გუშინ მომხდარ ძალიან სერიოზულ ინციდენტთან დაკავშირებით გააკეთა შემდეგი განცხადება:

„გუშინ ყველამ ვიხილეთ მასობრივი ფიზიკური ძალადობის ის შემაძრწუნებელი ვიდეო კადრები, რომელსაც ადგილი ჰქონდა მარნეულში სახელისუფლებო პარტიის ადგილობრივ წარმომადგენლებსადა ოპოზიციას შორის. როგორც სჩანს ეს იყო პირდაპირი ჯგუფური თავდასხმა ოპოზიციის ადგილობრივი ორგანიზაციის წევრებზე და მათ მხარდამჭერებზე.

ამ ინციდენტის დროს თავს დაესხნენ და სერიოზული ფიზიკური დაზიანებები მიაყენეს როგორც ოპოზიციის აქტივისტებს, ასევე ჟურნალისტებს და არჩევნების სადამკვირვებლო ორგანიზაციის წარმომადგენლებს.

განსაკუთრებით საგანგაშოდ მიგვაჩნია ის ფაქტი, რომ ამ ინციდენტში აქტიურად მონაწილეობდნენ სახელისუფლებო პარტიის ადგილობრივი ორგანიზაციის ლიდერები, მარნეულის საკრებულოს თავმჯდომარე და ადგილობრივი მუნიციპალიტეტის სხვა წევრები. თავდასხმების და ძალადობის მთელი ეს სერია ხორციელდებოდა მარნეულის ცენტრში, პოლიციელების თვალწინ, რომლებმაც დროულად ვერ აღკვეთეს ღია აგრესიის და ჯგუფური ძალადობის მთელი ეს სერია, რომელსაც მოჰყვა უმძიმესი შედეგები.

კიდევ უფრო დიდ შეშფოთებას იწვევს ცენტრალური ხელისუფლების ზოგიერთი ლიდერის ის არაადეკვატური, უპასუხისმგებლო განცხადებები, რომელიც იმ დღესვე, დაუყონებლივ მოაყოლეს მარნეულის აღნიშნულ ინციდენტს. პარტია ქართული ოცნების ლიდერებმა, ყოველგვარი გამოძიების გარეშე, ისე რომ აღნიშნული ძალადობა არც კი დაუგმიათ, მომხდარში ყოვლად უაპელაციოდ დაადანაშაულეს ოპოზიცია, რითაც ფაქტიურად წაახალისეს ძალადობის ეს აქტი.

„დამოუკიდებელ პოლიტიკურ ექსპერტთა ასოციაცია“ გმობს უკანონობის და ძალადობის ყოველგვარ გამოვლინებას ვისგანაც არ უნდა მოდიოდეს ეს და მოუწოდებს ხელისუფლებას დაუყონებლივ აღკვეთოს აშკარად გამოხატული აგრესია და ძალადობა, რომლის ინსპირაციის წყაროც და განმახორციელებელიც ხშირად მათივე წარმომადგენლები, ან მათ მიერ წახალისებული ძალები არიან.

ძალადობის მიმართ ასეთი უპასუხისმგებლო და შემწყნარებლური დამოკიდებულება ნამდვილად ხელს არ უწყობს ნორმალური, ცივილური საარჩევნო გარემოს შექმნას და არჩევნებზე მოსახლეობის პოლიტიკური ნების თავისუფლად გამოვლენას“.