„დამოუკიდებელ პოლიტიკურ ექსპერტთა ასოციაციის“ თავმჯდომარემ - გელა კვაჭანტირაძემ ყარაბახის კონფლიქტის გააქტიურებასთან დაკავშირებით გააკეთა შემდეგი განცხადება:
„ჩვენ ყველა, საქართველოს მთელი საზოგადოება შეშფოთებული ვართ აზერბაიჯანსა და სომხეთს შორის სამხედრო კონფლიქტის გააქტიურებით. ყურადღებით და დიდი თანაგრძნობით ვადევნებთ თვალს კონფლიქტის ზონაში მიმდინარე პროცესებს, ადამიანურ მსხვერპლს და მხარეებს შორის დაძაბულობის ესკალაციას.
საქართველო რა თქმა უნდა დაინტერესებულია მშვიდობიანი კავკასიით, ჩვენს მეზობელ სახელმწიფოებთან კარგი, მეგობრული ურთიერთობით, რადგან მიგვაჩნია, რომ მშვიდობიანი კავკასიის გარეშე შეუძლებელია თითოეული ჩვენი ქვეყნის განვითარება და მოსახლეობის კეთილდღეობის მიღწევა.
ყველას კარგად გვესმის, რომ ამ კონფლიქტთან მიმართებაში საქართველო რა თქმა უნდა ვერ იქნება კონფლიქტის მხარე, მაგრამ მიგვაჩნია, რომ ჩვენ უნდა გვქონდეს პრობლემის მკაფიო ხედვა და მკაფიო პოზიცია. ამასთან ერთად, ყველაფერი უნდა გავაკეთოთ იმისთვის, რომ ხელი შევუწყოთ კონფლიქტის მშვიდობიანი გზით დარეგულირებას და მის გადაწყვეტას საერთაშორისო სამართლის ძირითადი პრინციპების და ნორმების შესაბამისად.
ჩვენი პოზიცია, რა თქმა უნდა ემყარება საერთაშორისო სამართლის ფუძემდებლურ პრინციპებს და გაერთიანებული ერების ორგანიზაციის შესაბამის რეზოლუციებს. როგორცცნობილია, საერთაშორისო სამართლის ერთ- ერთი ფუნდამენტური პრინციპი, რომელსაც ემყარება დღევანდელი ცივილიზებული მსოფლიოს სტაბილურობა და სახელმწიფოთა შორის ურთიერთობა, ესაა ქვეყნების ტერიტორიული მთლიანობის აღიარების და საზღვრების ურღვევობის პრინციპი.ამიტომ მიგვაჩნია, რომ ტერიტორიული მთლიანობის საკითხში, სომხეთსა და აზერბაიჯანს შორის საკითხი სრულიად გარკვეულია. ჩვენ, ისევე როგორც მთელი ცივილური მსოფლიო, რა თქმა უნდა ვაღიარებთ და პატივს ვცემთ აზერბაიჯანის ტერიტორიულ მთლიანობას და შეუძლებლად მიგვაჩნია ეს საკითხი კითხვის ნიშნის ქვეშ დადგეს.
რაც შეეხება დევნილთა დაბრუნებას, ადამიანის უფლებების დაცვასდა სხვა ჰუმანიტარულ საკითხებს, ჩვენ მუდამ მზად ვართ ჩვენი შესაძლებლობის ფარგლებში ხელი შევუწყოთ ამ საკითხების მშვიდობიანად, მხარეებს შორის დიალოგით და ურთიერთმისაღები ფორმით გადაწყვეტას.
მშვიდობას ალტერნატივა არ გააჩნია, ამიტომ მიგვაჩნია, რომ თითოეული ქვეყანა სასიცოცხლოდ დაინტერესებული უნდა ვიყოთ კავკასიის სამ ერს შორის მეგობრული, ცივილური ურთიერთობის და მჭიდრო ურთიერთთანამშრომლობის ჩამოყალიბებაში. გვსურს კავკასიის სამივე ქვეყანაში იყოს მშვიდობა და ერთად მივაღწიოთ განვითარების და კეთილდღეობის ისეთ მაღალ დონეს, როცა ტერიტორიულ-სასაზღვრო საკითხების პრობლემატიკა თანდათან დაკარგავს დღეს არსებულ სიმწვავეს და წინ წამოიწევს რეგიონული თანამშრომლობის, ქვეყნების სწრაფი განვითარების და მოსახლეობის ცხოვრების დონის მკვეთრად ამაღლების საკითხები“.
მასალის გამოყენების პირობები