თალაკვაძის ულტიმატუმი და ოპოზიციის პასუხი - "მანდატზე უარი ერთი თვის წინ ვთქვით, აქამდე რატომ არ დააკმაყოფილეთ?"

პოლიტიკა - 13:16, 23 Jan, 2021

606

ოპოზიციისთვის გაუგებარია, რატომ არ შეუწყდათ დეპუტატის უფლებამოსილება აქამდე, მაშინ როდესაც ამის შესახებ განცხადება რამდენიმე კვირის წინ დაწერეს. ხელისუფლების ოპონენტებმა დღეს არჩილ თალაკვაძის ულტიმატუმს უპასუხეს, რომელმაც თქვა, რომ "რჩება ერთი კვირა, რათა ოპოზიციურმა პარტიებმა სადეპუტატო უფლებამოსილების შეწყვეტაზე საკუთარ გადაწვეტილებებს და მოლაპარაკებების პირობებს გადახედონ და საბოლოო გადაწყვეტილება მიიღონ".

უცვლელია ნაციონალური მოძრაობის პოზიცია - ენმ მანდატზე უარს ამბობს:

"ჩვენ დაწერილი გვაქვს განცხადებები, იმიტომ, რომ არ ვცნობთ იმ პარლამენტის ლეგიტიმაციას, თუ არ იქნება ვადამდელი რიგგარეშე...", - ამბობს ხატია დეკანოიძე.

"გირჩი - მეტი თავისუფლებას" ლიდერი ზურაბ ჯაფარიძე კი თალაკვაძის წინადადებას იაფფასიან შანტაჟის მცდელობას უწოდებს.

"მანდატზე უარი მაქვს ნათქვამი ერთი თვის წინ, როცა პარლამენტში განცხადება შევიტანე ოფიციალურად. აქამდე რატომ არ დააკმაყოფილეს ესეც არ მესმის. არ მჯერა, რომ ახლა ვინმე არის ოპოზიციაში ვისაც განცხადება აქვს დაწერილი და ამ ერთ კვირიანი ულტიმატუმის გამო შევარდება პარლამენტში და განცხადებას უკან გამოიტანს. მორიგი იაფფასიანი შანტაჟის მცდელობაა", - ამბობს ზურაბ გირჩი ჯაფარიძე.