ნიკა მელიასა და გიორგი რურუას უფლებადამცველები თვლიან, რომ ევროპული საბჭოს პრეზიდენტის შარლ მიშელის მიერ წარმოდგენილი დოკუმენტი, სადაც პოლიტპატიმრების საკითხია მოცემული, რისკებს შეიცავს.
როგორც მელიას ადვოკატი გიორგი კონდახაშვილი აცხადებს, ენმ-ს თავმჯდომარის პოზიცია ამნისტიასთან დაკავშირებით უცვლელია და ის ოცნებასთან საკუთარი თავისუფლების ვაჭრობას არ აპირებს:
"ამნისტიის საკითხთან დაკავშირებით ნიკას არაერთხელ აქვს დაფიქსირებული მისი ურყევი პოზიცია, რომ ეს არის მისთვის მიუღებელი. ვინაიდან ამით გამოდის, რომ 20 ივნისის ისტორიის გადაწერა უნდა მოხდეს, ერთ პლატფორმაზე უნდა იქნას განხილული ახალგაზრდა, პატრიოტული სულისკვეთებით გამოსული მოქალაქეები, რომლებსაც მიაყენეს სხეულის სხვადასხვა სახის დაზიანებები და ის სავარაუდო დამნაშავე მაღალი და საშუალო რგოლის თანამდებობის პირები ვინც შექმნა 20 ივნისი", - განაცხადა კონდახაშვილმა.
როგორც რურუას ავდოკატი დიმიტრი საძაგლიშვილი განმარტავს, სააპელაციოში შეტანილია საჩივარი, რომელიც 2 თვეში უნდა განხილულიყო, თუმცა უკვე 7 თვეზე მეტი გავიდა და არც ერთი სხდომა ჩატარებულა, რათა გადაწყდეს მისი პატიმრობაში ყოფნა-არ ყოფნის საკითხი:
"გვაქვს ორი ალტერნატივა, ერთი - პრეზიდენტის მიერ შეწყალება, ხოლო მეორე რაც აგრეთვე მნიშვნელოვანია სასამართლოს მიერ გადაწყვეტილების მიღება. სააპელაციოში შეტანილი გვაქვს საჩივარი, უნდა განხილულიყო 2 თვეში, გასულია 7 თვეზე მეტი და ერთი სხდომაც არაა ჩატარებული. სააპელაციოს შეუძლია დანიშნოს სხდომა და დაასრულოს გიორგი რურუას პოლიტიკური პატიმრობა", - განაცხადა საძაგლიშვილმა.
რაც შეეხება ამნისტიას, სალომე ზურაბიშვილი არ პასუხობს კითხვებს, აქედან გამომდინარე, უცნობია, ხელს მოაწერს თუ არა პოლიტპატიმრების გათავისუფლებას.
მასალის გამოყენების პირობები