უცხოური მიკროსქემების გარეშე რუსული "Искандер"-ები, "Торнадо-С" და სხვა თანამედროვე იარაღი ჯართად იქცევა, თუ დასავლეთი ე.წ. "შავ ხვრელებს" ამოქოლავს - ბრიტანეთის თავდაცვითი კვლევების ინსტიტუტი

ბრიტანეთის სამეფო გაერთიანებული თავდაცვითი კვლევების ინსტიტუტი (RUSI), Reuters-სა და გამოცემა "მნიშვნელოვან ისტორიებთან ერთად ჩატარებულ  60 გვერდიან კვლევას აქვეყნებს, რომელიც რუსეთის თანამედროვე იარაღის დამზადების საკითხებს ეხება,

RUSI აცხადებს, რომ რუსეთის თანამედროვე სამხედრო ტექნიკაში გამოიყენება 450-მდე სხვადასხვა იმპორტული კომპონენტი, რომელიც დამზადებულია აშშ-ში, იაპონიაში, ტაივანში, კორეაში და ევროპის ქვეყნებში.

გამოკვლევის თანახმად, უცხოური მიკროსქემების გარეშე რუსული "Искандер"-ები "Торнадо-С", დრონები და სხვა იარაღი ჯართად იქცევა, თუ მას უცხოური წარმოების მიკროსქემები და სხვა ელექტრონული მოწყობილობები არ ექნა. თუმცა, მკვლევარები აცხადებენ, რომ სანქციების მიუხედავად, კრემლი კვლავ ახერხებს მათ შეძენას მესამე ქვეყნებისა და ე.წ. "შავი ხვრელების" მეშვეობით.  

ამასთან რიგი კომპონენტები ქვეყანაში ლეგალური გზითაც ხვდება, რადგან ისინი ორმაგი დანიშნულების არიან, როგორც სამოქალაქო, ასევე სამხედრო წარმოებაში. 

ექსპერტების აზრით, რუსეთი ამ ნაწილების შესყიდვაში მესამე ქვეყნებს უკრაინაში ომის დაწყებამდეც იყენებდა, სპეცსამსახურების არხებისა და ყალბი კომპანიების მეშვეობით. ეს მეთოდი სსრკ-ს დროსაც აპრობირებული იყო. 

რუსეთი იყენებს ასევე მიკროელექტრონიკის ისეთ მსხვილ ჰაბებს, როგორიცაა ჰონკონგი და მალაიზია. 

სანქციების შემდეგ კრემლი ცდილობს მასიურად შეიძინოს ბაზარზე არსებული მიკროელექტრონიკის ნაწილები რადგან სანქციების კიდევ უფრო გამკაცრების შემთხვევაში, აცნობიერებს, რომ ისინი მისთვის მიუწვდომელი შეიძლება გახდეს მრავალი წლის განმავლობაში. 

ექსპერტები დასავლეთის ქვეყნებს შემდეგი ზომების მიღებას სთავაზობენ:

• გაამკაცრონ საექსპორტო კონტროლი საკუთარ ქვეყნებში;

• საერთაშორისო დონეზე თანამშრომლობის მეშვეობით გამოავლინონ და დახურონ ფარული შესყიდვების რუსული ქსელები;

• ყველანაირად შეუშალონ ხელი მიკროელექტრონიკის წარმოებას იმ ქვეყნებში, რომლებიც ღიად თუ ფარულად მხარს უჭერენ რუსეთს; 

• შეზღუდონ სანქცირებული საქონლის რეექსპორტი რუსეთში მესამე ქვეყნებიდან.

"თუ რუსეთს შეეზღუდება წვდომა ამ კომპონენტებზე, მისი სამხედრო მრეწველობა ვერ აღადგენს იმ არსენალს, რომელიც მან დახარჯა უკრაინაში," - აცხადებენ ისინი.