"ექსკლუზიურად ძალაუფლების შენარჩუნებაზე არის ორიენტირებული „ქართული ოცნება“" - თინა ხიდაშელი

,,ბიუჯეტი დამტკიცება თუ არა, უბიუჯეტოდ არ რჩება ქალაქი და ეს მითი, რომელიც უნდათ, რომ შექმნან, რომ რამდენიმე ქალაქი 2022 წელს ბიუჯეტის გარეშე იქნებოდა, არის აბსოლუტური ტყუილი და იმ დემაგოგიის კლასიკიდან, რომლითაც დაკავებულია საქართველოს ხელისუფლება" - ეს განცხადება თავდაცვის ყოფილმა მინისტრმა თინა ხიდაშელმა ,,პალიტრა ნიუსის" ეთერში გააკეთა. 

ხიდაშელის განმარტებით ,,ქართული ოცნებისგან" არაფერი აღარ დარჩა და ის არ არის ძალა, რომელიც უნდა იყოს ხელისუფლებაში, რადგანაც მთავარი და ფუნდამენტური ღირებულებები მისთვის არ არსებობს. 

,,რასაც ეს დღეებია საკრებულოებთან მიმართებით ვხედავთ, ამაზე უფრო მეტად ჟანრის კლასიკა არ არსებობს, იმის დასამტკიცებლად, რომ აბსოლუტურად, ფუნდამენტურად, ერთმნიშვნელოვნად და ექსკლუზიურად ძალაუფლების შენარჩუნებაზე არის ორიენტირებული „ქართული ოცნება“ და საერთოდ სხვა არაფერი მათ დღის წესრიგში არ არის.

ბიუჯეტი დამტკიცება თუ არა, უბიუჯეტოდ არ რჩება ქალაქი და ეს მითი, რომელიც უნდათ, რომ შექმნან, რომ რამდენიმე ქალაქი 2022 წელს ბიუჯეტის გარეშე იქნებოდა, არის აბსოლუტური ტყუილი და იმ დემაგოგიის კლასიკიდან, რომლითაც დაკავებულია საქართველოს ხელისუფლება. ნებისმიერ შემთხვევაში, როდესაც ბიუჯეტს არ ამტკიცებს პარლამენტი ან საკრებულოები, ავტომატურად გრძელდება და მოქმედებს წინა წლის პარამეტრებით. ეს პრობლემა, რომ, ვთქვათ, ქალაქი ან რეგიონი ბიუჯეტის გარეშე დარჩებოდა, აბსოლუტურად არ შეესაბამება სიმართლეს.

კარგი, წელს ამ ხრიკს მიმართეს და აბსოლუტურად უზნეოდ მოიქცნენ, მაგრამ 2022 წლის დეკემბერიც ხომ დადგება. მერე რა უნდა მოხდეს, ვის უნდა მიაღებინონ ბიუჯეტი, თუ ჰგონიათ, რომ უმრავლესობა ისევ მათ ექნებათ? აბსურდში არიან, ამიტომ ვთქვი, რომ სამწუხაროდ, ყველა გადაწყვეტილება, რომელსაც ჩვენ ვუყურებთ ბოლო პერიოდის განმავლობაში არის უკიდურესად მოკლე-მოკლე ნაბიჯებით სიარული, იმ წუთიერი ემოციის ქვეშ მიღებული გადაწყვეტილებები, რომლის გაგრძელებაც არც „ქართული ოცნების“ ლიდერებს, არც მათ მხარდამჭერებს და არც მათ მთავარ ლიდერს აქვს დანახული", - განაცხადა ხიდაშელმა. 

შეგახსენებთ, ბათუმისა და ზუგდიდის საკრებულოებში 2022 წლის ბიუჯეტის განხილვა დაჩწარებული წესით მიმდინარეობს და მას წინა მოწვევის საკრებულო განიხილავს, სადაც ,,ქართული ოცნება" უმრავლესობითაა წარმოდგენილი.