სისტემური ღალატი - "თავდაცვის სამინისტრო იქცა რუსული სპეცსამსახურების ქვედანაყოფად" - ნიკა მელია ქართველი ოფიცრის საქმეზე

ერთიანი ნაციონალური მოძრაობის თავმჯდომარე ნიკა მელია ქართველი მებრძოლების პირადი ინფორმაციის რუსეთის სპეცსამსახურების ხელში აღმოჩენის საკითხს ეხმაურება. ოპოზიციის ლიდერმა განცხადება საგანგებო ბრიფინგზე გააკეთა. "ეს არის სისტემური ღალატი... რომლის უკანაც თავდაცვის სამინისტრო დგას" - განაცხადა ენმ-ის თავმჯდომარემ.

"დღევანდელი უსამშობლო კაპიტულანტების, კოლაბორაციონისტების ხელისუფლება ჰყიდის სახელმწიფოებრიობას ბითუმად და ჰყიდის ჯარისკაცებს ცალობით. აბარებს მათ ოკუპანტ რუსებს და ეს ბრალდება აღარ არის. ეს არის ფაქტის კონსტანტანცია.

ვნახეთ თუ როგორ აწვდის უსამშობლო ხელისუფლება ქართველი ჯარისკაცების პირად საქმეებს იმ რუსებს, რომლის წინააღმდეგაც ისინი იბრძოდნენ 2008 წელს და იბრძვიან ახლა უკრაინაში. ჩვენ ვიხილეთ, როგორ აღმოჩნდა მიხეილ ქამხაძის, გამოცდილი ჯარისკაცის პირადი საქმე ოკუპანტის ხელში. ინფორმაცია, რომელიც საქართველოს თავდაცვის სამინისტროს არქივში ინახებოდა. ეს უმძიმესი ფაქტი უკვე ცხადყოფს, რომ საქართველოს თავდაცვის სამინისტროშიც არსებობს ძლიერი რუსული გავლენები და ქსელი, რომლის მეშვეობითაც, ნებისმიერი  დეტალური ინფორმაცია, რომელიც დასჭირდება ოკუპანტს თითოეულ ქართველ სამხედროსა და მის ოჯახის წევრებზე, აღმოჩნდება მათ ხელში. ეს არ არის ინდივიდუალური ღალატი. ეს არის რუსეთის ოცნების მთავრობის მიერ განხორციელებული სისტემური ღალატი და სამშობლოს გაყიდვა. საქართველოს თავდაცვის სამინისტრო იქცა რუსული სპეცსამსახურების ქვედანაყოფად. " ამბობს მელია.

მელიამ ამავე თემაზე სოციალურ ქსელში პოსტიც გამოაქვეყნა.

 

"მთავარმა არხმა" 8 აგვისტოს მოამზადა რეპორტაჟი, რომ ქართველი ოფიცრის პირადი საქმე რუსული სპეცსამსახურების ხელშია. საოკუპაციო რეჟიმს სრული წვდომა აქვს მიხეილ ქამხაძის მონაცემებთან, რომელიც თავდაცვის სამინისტროში უნდა ყოფილიყო დაცული.