ევროპარლამენტის საგარეო ურთიერთობათა კომიტეტის თავმჯდომარე, დევიდ მაკალისტერი, სამხრეთ კავკასიასთან ურთიერთობათა დელეგაციის თავმჯდომარე, მარინა კალიურანდისა და ევროპარლამენტში საქართველოს საკითხებზე მომხსენებელი, სვენ მიქსერი საქართველოს შესახებ წერილს აქვეყნებენ.
წერილში აღნიშნულია, რომ რუსეთის აგრესიიდან 12 წელი გავიდა, მისი გავლენები კი კვლავ იგრძნობა.
"საქართველოს ტერიტორიის 1/5 კვლავ ოკუპირებულია, ათობით ათასი ადამიანი კვლავ ვერ უბრუნდება საკუთარ საცხოვრებელ ადგილს და ეზღუდებათ ფუნდამენტური უფლებები და თავისუფლება. საქართველო კვლავ სხვადასხვა რუსული ჰიბრიდული აქტივობის სამიზნეა, როგორებიცაა სადეზინფორმაციო კამპანიები და კიბერ-შეტევები" -ნათქვამია წერილში.
განცხადებაში ნათქვამია, რომ ამ მოვლენამ მხოლოდ გააძლიერა საქართველოს ევრო-ატლანტიკური სტრუქტურებთან ურთიერთობა და ქვეყანამ თავი დაიმკვიდრა, როგორც ერთ-ერთმა დასაყრდენმა პარტნიორი აღმოსავლეთ სამეზობლოში.
"ევროკავშირთან გაძლიერებულმა თანამშრომლობამ, ასოცირების შეთანხმების, ღრმა და ყოვლისმომცველი თავისუფალი ვაჭრობის ხელშეკრულების და ვიზალიბერალიზაციის მეშვეობით საქართველოს მოსახლეობამ პირდაპირი და ხელშესახები სარგებელი მოუტანა" - ვკითხულობთ დოკუმენტში.
განცხადებაში ნათქვამია ისიც, რომ აფხაზეთისა და ოკუპირებული ცხინვალის რეგიონის მოსახლეობა ვერ იღებს ევროკავშირთან ურთიერთობების გაღრმავებით მიღებულ სარგებელს.
"ჩვენ კვლავ მტკიცე მხარდაჭერას ვუცხადებთ საქართველოს დამოუკიდებლობას და ტერიტორიულ მთლიანობას მის საერთაშორისოდ აღიარებულ საზღვრებში და მოვუწოდებთ რუსეთს, გადადგას ნაბიჯები კონფლიქტის მშვიდობიანი მოგვარებისკენ ", - აღნიშნულია განცხადებაში.
დოკუმენტში საუბარია ცეცხლის შეწყვეტის შეთანხმების შესრულების აუცილებლობის შესახებაც.
ავტორების მკაფიო გზავნილია, რომ რუსულმა მხარემ უნდა შეასრულოს თავისი ვალდებულებები და მისცეს ევროკავშირის სადამკვირვებლო მისიას ოკუპირებულ ტერიტორიაზე წვდომის უფლება, რუსეთმა შეწყვიტოს უკანონო ბორდერიზაცია და ადამიანების ფუნდამენტური უფლებების დარღვევა.
მასალის გამოყენების პირობები