ყარაბაღში კვლავინდებურად უმძიმესი მდგომარეობაა- გასული ღამის განმავლობაში აქტიურად მიმდინარებოდა აზერბაიჯანულ და სომხურ მხარეს შორის საარტილერიო დუელები. ამ დრომდე გრძელდება პოზიციური შეტაკებები- ფრონტის მთელ ხაზზე მოწყობილ მიწა-თხრილებში შეტევა-კონტრშეტევის არაერთი ფაქტი დაფიქსირდა.

სოციალურ მედიაში გამოქვეყნდა უმძიმესი ვიდეო, რომელიც ასახავს სანგარში მყოფ სასოწარკვეთილებაში ჩავარდნილ სომეხ ჯარისკაცებს, რომელთაგან ერთ-ერთი მათგანი ამბობს, რომ ისინი სარდლობამ მიატოვა. ჯარისკაცი ჩაფხუტზე დამაგრებული ვიდეოკამერით იღებდა არსებულ სიტუაციას, რა დროსაც მის პოზიციას ცხრილავენ ტყვიამფრქვევიდან, რის შემდეგადაც იგი უგონოდ ეცემა, ხოლო მისი თანამებრძოლი კი მძიმე ფსიქოლოგიური სტრესისგან მთელი ხმით ყვირის და შებრალებას ითხოვს.

ექსპერტთა შეფასებით, ორივე დაპირისპირებული მხარე საინფორმაციო ომს ეწევა და ფრონტის ხაზზე მორალური უპირატესობის მოსაპოვებლად მტრის დანაკარგების შესახებ გადაჭარბებულ ციფრებს ასახელებს. სომხური მხარის თქმით, განადგურებულია 700-ზე მეტი აზერბაიჯანელი სამხედრო, აფეთქებულია 130-ზე მეტი ტანკი და 72 უპილოტო საფრენი აპარატი. სომხური დაზვერვის მიერ მოპოვებული ინფორმაციის თანახმად კი დაჭრილების სახით 1900-ზე მეტი ადამიანი არის დაშავებული აზერბაიჯანელთა მხრიდან.

სომხურმა მხარემ აგრეთვე გამოაქვეყნა ფრონტის ხაზის ამსახველი ვიდეო, სადაც ჩანს თუ როგორ აქვთ პოზიციები მოწყობილი და რა ინტენსივობით მიმდინარეობს საარტილერიო დუელები ერთმანეთის პირისპირ. ამავე ვიდეოში ჩანს, სომეხთა 2 აფეთქებული ტ-72-ის ტიპის ტანკი. სომხური არმიის პოზიციებს აქტიურად ამუშავებს თურქული წარმოების აზერბაიჯანული უპილოტოები და ებრაული კამიკაძე დრონები. სომეხი სამხედროების განცხადებით, იმის გათვალისწინებით, რომ უპილოტო საჰაერო დამრტყმელი აპარატები დაუსჯელად მოქმედებენ და უჭირთ მათი განეიტრალება, ძალზე მძიმედ მოქმედებს წინა ხაზზე მყოფ სამხედროთა ფსიქოლოგიურ განწყობაზე- „ არ ვიცით, რა დროს საიდან დაგვეცემა ჭურვი თუ რაკეტა“.