"ლოკდაუნის" პარალელურად საახალწლო განათებებში დახარჯული დიდი თანხები - თელავში ადგილობრივი ბიუჯეტიდან 60 ათასი ლარი გამოიყო

პოლიტიკა - 16:09, 29 Nov, 2020

1227

ქვეყანაში გამოცხადებული ლოკდაუნისა და დაწესებული ე.წ. კომენდანტის საათის მიუხედავად, თელავი ახალ წელს ძვირადღირებული მორთულობით ხვდება - ადგილობრივი ბიუჯეტიდან საახალხლწო განათებებისთვის 60 ათასი ლარი უკვე გამოიყო.

ოპოზიციის განცხადებით, ქვეყანაში არსებულ მძიმე ეკონომიკურ ფონზე ადგილობრივი ხელისუფლება საკუთარ თავს ფუფუნების უფლებას არ უნდა აძლევდეს, ამასთან, ეს მოსახლეობისთვის არაფრის მომცემი ხარჯია, რადგან ღამით, როდესაც ქალაქი უნდა განათდეს, ქუჩაში გასვლა აკრძალულია:

"თუ ადამიანები გარეთ არ ივლიან ჩემთვის ეს გაუგებარი და გაუმართლებელია ვის უნათებენ? რომ ვთქვა თავისთვის ინათებენ მეთქი ბიძინა ივანიშვილია ღამის 10 საათზე იძინება და მითუმეტეს არამგონია ჩვენ ქალაქში მოხვდეს და დაინტერესდეს ამ საახალწლო განათებებით. ეს ფული უნდა მოეხმარებინათ იმ ადამიანებისთვის, ვინც პანდემიის პირობებში უმუშევრები დარჩენენ", - განაცხადა "ლეიბორისტული პარტიის" კახეთის ბიუროს თავმჯდომარემ ნიკოლოზ ვარდოშვილმა.

თელავის მერის მოადგილის ფიქრია ყუშიატაშვილის განცხადებით, ქალაქში მასშტაბური ღონისძიება არ იგეგმება, ლამაზი განათებები კი მოსახლეობას განწყობას აუმაღლებს, მით უფრო, რომ ქვეყანაში არსებული მძიმე ეპიდემიოლოგიური ფონი მათ ფსიქოლოგიაზე უარყოფითად მოქმედებს:

"ეს კრიტიკა ისმის არა მხოლოდ ჩვენი მუნიციპალიტეტის მისამართით არამედ მთელი ქვეყნის მასშტაბით, იქ სადაც ხდება ზრუნვა საახალწლო განთებებზე. მწვავე პანდემიის ფონი ძალიან ბევრ მომენტს მოიცავს. ეს არის ერთ-ერთი და ძალიან მნიშვნელოვანი ფსიქოლოგიური მიმართება და მაშინ როდესაც ძალიან მძიმე ფსიქოლოგიური ფონია ჩვენ ვფიქრობთ, რომ რაღაც სეგმენტში უნდა მაინც უნდა იყოს საახალწლო განწყობა, რადგან იმედი კვდება ყველაზე უფრო ბოლოს", - აღნიშნა ფიქრია ყურშიტაშვილმა.

თელავი ერთადერთი ქალაქი არ არის, სადაც ახალ წელს, მძიმე ეკონომიკური პირობების მიუხედავად, ძვირადღირებული მორთულობებით ხვდებიან. ეს ყველაფერი კი იმის ფონზე, რომ მოქალაქეები ღამით, საახალწლოდ განათებულ ქუჩებში ე.წ. კომენდანტის საათის გამო ვერ გადაადგილდებიან და ამ სილამაზეს ისევ ის მაღალჩინოსნები დაინახავენ, რომლებსაც საშვებიც აქვთ და წინასაახალწლო განწყობაც ამაღლებული ექნებათ.