ექიმთა საქველმოქმედო ჯგუფი, ფონდ „მზის შვილების“ ეგიდით, 17 აპრილს, დედოფლისწყაროს მუნიციპალიტეტის სოფელ სამთაწყაროში მორიგ საქველმომქმედო აქციას გამართავს - მოსახლეობას უფასო სამედიცინო სერვისი მიაწოდებს და ამასთან, მედიკამენტებს გადასცემს.
„ეს ჩვენი ექიმთა საქველმოქმედო ჯგუფის უკვე რიგით მესამე აქციაა - ილტოს ხეობის, ასპინძის რაიონის სოფელ ნაქალაქევისა და ახალქალაქის სოფელ კოთელიას შემდეგ, ხვალ, 17 აპრილს, დედოფლისწყაროს მუნიციპალიტეტის სოფელ საბათლოს მოსახლეობას გავუწევთ უფასო სამედიცინო მომსახურებას საერთოდ, მსოფლიოსა და შესაბამისად, ჩვენს ქვეყანაში შექმნილი კოვიდპანდემიის გამო, განსაკუთრებით ის ადამიანები, რომლებიც დიდ ქალაქებსა და რეგიონული ცენტრებიდან მოშორებით მდებარე სოფლებში ცხოვრობენ, იმ დილემის წინაშე დადგნენ, რომ სხვადასხვა სამედიცინო მომსახურეობას ვეღარ იღებენ. ჩვენი საქველმოქმედო აქციებიც სწორედ ამას ემსახურება. სოფელ სამთაწყაროსთვის ეს აქცია განსაკუთრებით მნიშვნელოვანია, რადგან პრაქტიკულად, სასაზღვრო ზონაა. ადგილობრივებს მედიკამენტებსაც გადავცემთ, რაშიც ფარმაცევტული კომპანია GM ფარმა დაგვეხმარა,“ - ამბობს პროფესორი, კარდიოლოგი სოლომონ ზეიკიძე და დასძენს, რომ მსგავს საქველმოქმედო აქციებს, მეგობრებთან ერთად, სამომავლოდაც გეგმავს.
ამასთან, აღსანიშნავია, რომ საქველმოქმედო აქციაში, რომელიც ამჯერად დედოფლისწყაროს მუნიციპალიტეტის ხელმძღვანელობის, კერძოდ, ნილოზ ჯანიაშვილის, ასევე, ნატალია კვანტალიანის სახელობის სისხლის ცენტრალური ბანკის, „ზედაზენისა“ და „ჯი-ემ ფარმას“ თანადგომით ტარდება, რამდენიმე დარგის ექიმი მონაწილეობს. კერძოდ: პროფესორი, კარდიოლოგი სოლომონ ზეიკიძე (საქველმოქმედო ჯგუფის ხელმძღვანელი); ექიმ-ფიზიოთერაპევტი ოდისეი სადოევი, ენდოკრინოლოგი ნათია დალაქიშვილი და კარდიოლოგი ქეთი გოროზია. აქციაში, მოხალისეებად ჩართულნი არიან ბექა გოგიაშვილი, გიორგი გოგლიძე, თემო ჯინჭარაძე და თამარ გახელაძე.
შეგახსენებთ: ექიმთა ჯგუფმა, ფონდ „მზის შვილების“ ეგიდით, ანალოგიური საქველმოქმედო აქცია, ახმეტის მუნიციპალიტეტში, კერძოდ, ილტოს ხეობაში, ასპინძის მუნიციპალიტეტის სოფელ ნაქალაქევსა და ახალქალაქის სოფელ კოთელიაში უკვე გამართა.
მასალის გამოყენების პირობები