კორონავირუსით ინფიცირების შემთხვევები მთელი ქვეყნის მასშაბით იზრდება. სასწავლო დაწესებულებებში მომატებულია ინფიცირებულთა რიცხვი, თუმცა განათლების სამინისტროს განმარტებით, სკოლებში ვითარება კონტროლს ექვემდებარება.
უწყების ინფორმაციით, 10-დან 16 აპრილის ჩათვლით, მთელი ქვეყნის მასშტაბით ინფექცია პედაგოგთა და სკოლის ადმინისტრაციის წარმომადგენელთა 0,3%, ხოლო მოსწავლეთა 0,1%-ს დაუდასტურდა.
დღეისთვის, სრულ დისტანციურ სწავლებაზე იმყოფება 73 სკოლა და 187 ცალკეული კლასი:
„ქვეყნის მასშტაბით გაიზარდა რისკ ჯგუფში მყოფი იმ მასწავლებლების რაოდენობა, რომელთაც დისტანციური სწავლების თხოვნით თავად მიმართეს და სკოლის მხრიდან შეღავათი გაეწიათ. ამ ეტაპზე დისტანციური სწავლების ფორმატში ქვეყნის მასშტაბით 133 პედაგოგი იმყოფება.
სკოლებში ინფიცირების გამოვლენის შემთხვევებში, როგორც წესი, კვლავ წერტილოვანი შეზღუდვები ვრცელდება. ვირუსის გამოვლენის შემთხვევაში, სკოლები ჯანდაცვის სამინისტროს მიერ დადგენილი პროტოკოლით მოქმედებენ.
მიმდინარე სტატისტიკიდან გამომდინარე, ცალსახაა, რომ საზოგადოების მხრიდან კიდევ უფრო მეტად არის საჭირო ჯანდაცვის სამინისტროს რეგულაციების დაცვა. სწორედ ამიტომ, საქართველოს განათლებისა მეცნიერების სამინისტრო კვლავ მოუწოდებს საზოგადოებას ხელი შეუწყონ ბავშვებს და ზედმიწევნით დაიცვან დაწესებული ნორმები, რათა მოსწავლეებმა სემესტრი სკოლის შენობაში დაასრულონ“, - ნათქვამია განცხადებაში.
მასალის გამოყენების პირობები