საკრებულოს ყოფილი წევრი სოსო მანჯავიძე ხვალინდელ აქციაზე მისვლას გეგმავს, რომელსაც სტუდენტები ნამახვანჰესის საწინააღმდეგოდ მართავენ. როგორც მან აღნიშნა, ხელშეკრულება, რომელიც ჰესის მშენებლობას ითვალისწინებს, გასაუქმებელია. რაც შეეხება ვასაძის კავშირს რიონის ხეობის მცველებთან, მანჯავიძე მათ თანამშრომლობას არ გამორიცხავს:
"პირველად მესმის ახლა, რომ ხვალ აქციაა, რა თქმა უნდა მივალთ, რადგან აბსოლუტურად ვიზიარებთ მათ სულისკვეთებას. ეს ხელშეკრულება ჰესთან დაკავშირებით სრულიად გასაუქმებელია და რა თქმა უნდა, ჰესი არ უნდა აშენდეს.
რაც შეეხება ზეგინდელ ჩვენს აქციას, ეს საჭიროა, რადგან ქვეყანაში აუტანელი ვითარებაა, როგორც ეკონომიკურად, ისე სოციალურად და მორალურად, ამიტომც საჭიროა კრიზისიდან გამოსვლა და რაღაცით უნდა დავიწყოთ. პოლიტიკური პარტიების წარმომადგენლებს არ ველოდებით ჩვენს აქციაზე და არც იქნება სწორი მათი მოსვლა. რაც შეეხება იმას, რომ ჩვენ, ლევან ვასაძის გუნდი და რიონის ხეობის მოძრაობა ვგეგმავთ თუ არა გაერთიანებას, ამის შესახებ ვარლამ გოლეთიანმა მკაფიოდ განაცხადა, რომ პოლიტიკურ გუნდებთან არ აპირებს საქმის დაჭერას, თუმცა ჩვენ არ ვართ პოლიტიკური ჯგუფი, ლევანს ჯერ პარტია არ დაუარსებია, ეს უბრალოდ იყო ინიციატივა. ამ ეტაპზე ასე და სამომავლო არაფერია გამორიცხული" - განაცხადა მანჯავიძემ.
მასალის გამოყენების პირობები