სარატოვის ოლქის სასამართლომ სერგეი ასატრიანს ("ასეტრინა უმცროსი"), ცნობილი "კანონიერი ქურდის" ედუარდ ასატრიანის ("ედიკ ტბილისსკი", იგივე "ასეტრინა უფროსი") შვილს 10 წელი მიუსაჯა. განაჩენს საფუძვლად ე.წ. "ანტიქურდული კანონი" დაედო, რომელიც პუტინმა 2019 წელს მიიღო.

პროკურატურის ცნობით, "ასეტრინა უმცროსი" 2008 წელს მოსკოვის ერთერთ რესტორანში "აკურთხეს ქურდად". ის მაშინ 22 წლის იყო. მან ქურდულ სამყაროში გავლენის ასამაღლებლად რამდენიმე მძიმე დანაშაული ჩაიდინა, რის გამოც ის დააპატიმრეს, თუმცა, "როგორც კანონიერი ქურდი, ის თავის "მოვალეობას" ციხეშიც ასრულებდა - ანიჭებდა "მაღალ ქურდულ სტატუსებს", ანაწილებდა გავლენის სფეროებს", - ნათქვამია განაჩენში.

სასამართლოზე ასატრიანს განემარტა, რომ "კანონიერი ქურდობისთვის" მას მკაცრი სასჯელი ეკუთცნოდა, თუმცა, მიუხედავად ამისა მან სტატუსზე უარი არ განაცხადა და დაადასტურა, რომ კრიმინალური სამყაროს მაღალ იერარქიას მიეკუთვნება.

სხვა მტკიცებულებებთან ერთად, სასამართლო სხდომაზე "ასეტრინა უმცროსის" ტატუც განიხილეს. კრიმინალური ექსპპერტებმა მისი ტატუების მიხედვით სასამართლოს მოახსენეს, რომ ტატუ "ობობა, რომელიც ზემოთ მიცოცავს" იმ ფაქტს აღნიშნავს, რომ მისი მფლობელი პროფესიონალი კრიმინალია და თავის საქმიანობიუს გაგრძელებას აპირებს, ხოლო რვაქიმიანი ვარსკვლავი ობობას მუცელზე და მის მუხლებზე, იმ ფაქტს, რომ ეს ადამიანი "არავის წინაშე არასდროს დაიჩოქებს".

სასამართლოს გადაწყვეტილებით, ათი წლიდან ასატრიანი 5 წელს ციხეში, ხოლო შემდგომ 5-ს - მკაცრი რეჟიმის კოლონიაში გაატარებს.