მკვლელობა თუ აუცილებელი მოგერიება? -"თავი გაუჩეხა, შვილებს ვიცავდით"- ახალი დეტალები და ფიგურანტები ბათუმში მომხდარი მკვლელობის საქმეში

კრიმინალი - 11:18, 05 Jan, 2021

1813

ბათუმში, ოცნების ქალაქში მომხდარი სისხლიანი დაპირისპირება და მკვლელობა - უმძიმესი დანაშაულის ირგვლივ მედიამ ახალი დეტალები გაარკვია. როგორც ირკვევა, ჩხუბისას კიდევ ერთი ახალგაზრდა დაიჭრა, თუმცა პოლიციას ის ამ დრომდე არ დაუკითხავს.

არსებული ინფორმაციით, ახალგაზრდა მამაკაცს ჭრილობები ცივი იარაღით მიაყენეს, თუმცა ფაქტით გამოძიება არ დაწყებულა.

სასტიკი მკვლელობა ბათუმში გუშინ მოხდა. მოკლულია 44 წლის გიორგი ბოლქვაძე. მკვლელობის მოტივად კი ერთი კვირის წინ მომხდარი დაპირისპირება სახელდება.

მკვლელობისთვის ბრალდებულია ჯამბულ მამულაძე. დაკავებულის ოჯახის წევრები ამბობენ, რომ მამულაძე თავს იცავდა, რადგან ბოლქვაძის დაჯგუფება მათ ოჯახში შეიჭრა და ინვენტარი დააზიანა.

მამულაძეების მტკიცებით, ახალგაზრდა ბიჭმა გიორგი ბოლქვაძეს თავდაცვის მიზნით დაარტყა.

"თავდაცვის მიზნით დაარტყა, შვილებს ვიცავდით, დედამთილსაც დაარტყეს"- აცხადებს დაკავებულის რძალი.

ბრალდებულის დედის მტკიცებით, მის შვილს დაზიანებები აღენიშნება, რომელიც გიორგი ბოლქვაძემ მიაყენა.

"ოჯახში მისულებს 15 ბიჭი დაახვედრა, თავი გადაუჩეხეს ჩემ შვილს. გარდაცვლილმა სკამი ჩაარტყა. დაცულად არ ვგრძნობთ თავს, პოლიცია კი არაფერს აკეთებს"- აცხადებს დაკავებული ჯემალ მამულაძის დედა.