"ამ ეკონომიკებმა ისარგებლეს რუსეთის იზოლაციით" - CNBC-ის სტატია საქართველოზე

ამერიკული გამოცემა CNBC წერს, რომ კავკასიის რეგიონის ქვეყნები საქართველო და სომხეთი, რომელთა ეკონომიკამ მოულოდნელად აღმასვლა განიცადა უკრაინის ომის შემდეგ, დასავლეთის მხრიდან "შურისძიების" პერსპექტივის წინაშე არიან.

"საერთაშორისო სავალუტო ფონდის მონაცემებით, 2022 წელს საქართველოს ეკონომიკა 10.1%-ით გაიზარდა, სომხეთის კი 12,6%-ით. 2023 წელს მათი ზრდა შენელდება დაახლოებით 4%-მდე და 5.5%-მდე, რაც ასახავს ზოგად ზომიერებას კავკასიისა და ცენტრალური აზიის ფართო რეგიონში, განაცხადა გაეროს სააგენტომ. მიუხედავად ამისა, ანალიტიკოსები ამბობენ, რომ ზრდის ფუნდამენტური მამოძრავებელი ფაქტორი „არ გამქრალა“ და შესაძლოა ეს ქვეყნები საერთაშორისო ყურადღების ცენტრში მოექცნენ", - ნათქვამია სტატიაში.
სტატიაში ნათქვამია, რომ დასავლეთმა "განგაში" გამოაცხადა, რომ გარკვეული მოვაჭრეები იყენებენ ისეთ ქვეყნებს, როგორიცაა სომხეთი, საქართველო, ყაზახეთი და თურქეთი, რათა თავიდან აიცილონ რუსეთის წინააღმდეგ სანქციები.

თავის უახლეს ეკონომიკურ პერსპექტივაში, ევროპის რეკონსტრუქციისა და განვითარების ბანკმა აღნიშნა, რომ ასეთი ქვეყნები იზოლირებული სახელმწიფოსთვის ე.წ. შუამავალი სავაჭრო პარტნიორები ხდებიან.

"მკვეთრად გაიზარდა ექსპორტი ევროკავშირიდან, გაერთიანებული სამეფოდან და შეერთებული შტატებიდან ცენტრალურ აზიასა და კავკასიაში, რაც მიანიშნებს „შუამავლობითი ვაჭრობის“ ზრდაზე, რომლის დროსაც საქონელი გადის ცენტრალური აზიის ეკონომიკაში და შემდეგ რუსეთში იყიდება", - აცხადებენ EBRD-ში.
გამოცემა აღნიშნავს, რომ საქსტატის მონაცემებით, წელს რუსეთი საქართველოს სიდიდით მეორე სავაჭრო პარტნიორი გახდა იმპორტით და მესამე უდიდესი სავაჭრო პარტნიორი ექსპორტით - 2022 წლისთვის ქვეყანაში რუსული იმპორტი 79%-ით გაიზარდა, ხოლო რუსეთში ექსპორტი 7%-ით გაიზარდა.

იმავდროულად, რუსეთი სომხეთის უმსხვილესი სავაჭრო პარტნიორია, როგორც იმპორტის, ასევე ექსპორტის თვალსაზრისით. ყირგიზეთმა, ტაჯიკეთმა და აზერბაიჯანმა, ისევე როგორც რეგიონის სხვა ქვეყნებმა, ასევე დააფიქსირეს რუსეთთან ვაჭრობის ზრდა გასული წლის განმავლობაში.

"რეგიონში სავაჭრო მოდელების შეცვლა არის შესაძლებლობა, მაგრამ ასევე რისკი" - თქვა საერთაშორისო სავალუტო ფონდის დირექტორის მოადგილემ ახლო აღმოსავლეთისა და ცენტრალური აზიის საკითხებში.
CNBC წერს, რომ საქართველოსა და სომხეთის მთავრობების სპიკერებმა დაუყოვნებლივ არ უპასუხეს თხოვნას კომენტარის გაკეთებაზე აღნიშნულ ზრდასთან დაკავშირებით.

გამოცემასთან IDFI-ის ეკონომიკური და სოციალური პოლიტიკის ხელმძღვანელი, მიხეილ კუკავა ამბობს, რომ საუბარია არასანქცირებულ საქონელზე, მაგრამ მათ ორმაგი დანიშნულება შეიძლება ჰქონდეთ, მაგალითად სარეცხი მანქანების ნაწილები შესაძლოა რუსეთმა სამხედრო წარმოებისთვის გამოიყენოს.

CNBC-ს ევროკომისიის სპიკერმა განუცხადა, რომ მუშაობენ იმისთვის, რომ დაადგინონ სავაჭრო ნაკადების გადამისამართება მესამე ქვეყნებიდან, რომლებიც მოქმედებენ როგორც შესაძლო კარიბჭე რუსეთისკენ.

მართალია ჯერ უცნობია როგორი იქნება სანქციების ახალი პაკეტი, მაგრამ ზოგიერთი ანალიტიკოსი ამბობს, რომ სანქციების პერსპექტივა ქვეყნებს თავისი მისწრაფებების გადააზრების საშუალებას მისცემს, განსაკუთრებით მათ ვინც ნატოსა და ევროკავშირისკენ ისწრაფვის. პოლიტიკა