აფგან მუხთარლი გომელაურის გადადგომას ითხოვს

აზერბაიჯანელი ჟურნალისტი, აფგან მუხთარლი შინაგან საქმეთა მინისტრის გადადგომას ითხოვს, თბილისიდან მისი გატაცების საქმესთან შესაძლო კავშირის გამო.

აზერბაიჯანელმა ჟურნალისტმა მთავრობის კანცელარიას და საქართველოს პარლამენტს ოფიციალურად მიმართა გომელაურის გადადგომის მოთხოვნით.

"ჩვენ მოვითხოვთ შს მინისტრ ვახტანგ გომელაურის თანამდებობიდან გადადგომას. როგორც იცით, სოსო გოგაშვილმა მისცა ჩვენება და განაცხადა, რომ ჩემი მოტაცება სწორედ გომელაურის ორგანიზებული იყო. ახლა გომელაური შს მინისტრია და მას შეუძლია, ზეწოლა მოახდინოს გენერალურ პროკურორზე. მე მინდოდა, დაწვრილებით გავცნობოდი სოსო გოგაშვილის ჩვენებებს, რაზეც თავდაპირველად პროკურატურამ მითხრა, რომ პრობლემა არ იქნებოდა. თუმცა, როდესაც მივედით პროკურატურაში, ამაზე უარი გვითხრეს. მე ვფიქრობ, რომ ეს არის არა იურიდიული, არამედ პოლიტიკური გადაწყვეტილება და ის მიღებულ იქნა მთავრობის ზეწოლის ქვეშ, რადგან მათ გომელაურის შენარჩუნება უნდათ შინაგან საქმეთა მინისტრის პოსტზე. დემოკრატიულ ქვეყნებში, როდესაც მინისტრი თავად არ მიდის თანამდებობიდან, მისი გათავისუფლება შეუძლია პრემიერ-მინისტრს, მაგრამ ეს არ მოხდა"- ამბობს მუხთარლი. მუხთარლი საკუთარი მოთხოვნის საფუძვლად ამჟამად პატიმრობაში მყოფი სუს-ის მაღალჩინოსნის, სოსო გოგაშვილის აღიარებას ასახელებს. გოგაშვილმა ციხიდან წერილი გამოაქვეყნა, რომელშიც ყვებოდა, რომ მუხთარლის მოტაცება გომელაურის უშუალო მონაწილეობით და ივანიშვილის მითითებით მოხდა.