"აღარ მაინტერესებს სააკაშვილის დიეტა" - ირაკლი ღარიბაშვილი

საქართველოს პრემიერ-მინისტრის ირაკლი ღარიბაშვილის დღევანდელი 20 ოქტომბრის განცხადებით, საქართველოს მესამე პრეზიდენტი და მის ირგვლივ განვითარებული მოვლენები, მას აღარ აინტერესებს. 

მისი თქმით ახლა იმის დრო არის, რომ ადამიანებს სიკეთეზე და იმ მომავალ გეგმებზე ესაუბრონ, რომელიც საქართველოს წინ აქვს. 

,,მოსახლეობას უნდა გავუფრთხილდეთ, საქმეზე უნდა ველაპარაკოთ, სიკეთეებზე პროექტებზე, ახალ საქმეზე. აღარ მაინტერესებს სააკაშვილის შიმშილობა თუ დიეტა", - განმარტავს ღარიბაშვილი. 

თუმცა პრემიერს მაინც მოუწია გაეკეთებინა განმარტებები ადამიანზე, რომლის ჯანმრთელობის თუ საქართველოში შემოსვლის საკითხი, დღესდღეობით ქართულ პოლიტიკაში ერთ-ერთი უმთავრესი საკითხია. 

მისი თქმით მიხეილ სააკაშვილი ვალდებული იყო პატივი ეცა საქართველოს კანონმდებლობისთვის და ისე შემოსულიყო ქვეყნის ტერიტორიაზე, რაც შეეხება მის ჯანმრთელობის მდგომარეობას, მან ხაზგასმით აღნიშნა, რომ სააკაშვილსაც გაეწევა ის დახმარება, რაც ნებისმიერ სხვა რიგით პატიმარს შეიძლება გაუწიოს პენიტენციალურმა დაწესებულებამ. 

,,კაცი, რომელიც პრეზიდენტი იყო კანონისთვის უნდა ეცა პატივი და არ უნდა გამოეკვეთა ქურდულად საზღვარი. თუ ჰქონდა კაცობა და ვაჟკაცობა, შემოსულიყო ღიად ქვეყანაში. შიმშილობის ფაქტები ხშირი არ არის, მაგრამ ყოფილა ციხეებში და როგორც უდგებიან და ზრუნავენ სხვა პატიმრებზე, ასევე ზრუნავენ სააკაშვილზე. არავითარი პრივილეგია არ ექნება არც ერთ პატიმარს", - განაცხადა ღარიბაშვილმა.