პრემიერმა მუხათგვერდზე აგვისტოს ომში კვლავ ენმ-ს პასუხისმგებლობაზე ისაუბრა, არ ახსენა პუტინი

აგვისტოს ომიდან 16 წლის თავზე ირაკლი კობახიძე ომის დაწყებაში წინა ხელისუფლებას ადანაშაულებს - რუსული კანონის მიმღები პრემიერი თავს "ნაციონალურ მოძრაობას" ესხმის და ამტკიცებს, რომ სააკაშვილის ხელისუფლებამ ევროსაბჭოს რეზოლუციაზე ხელმოწერით რუსეთთან ომი დაიწყო.

ივანიშვილის გუნდის წევრი მუხათგვერდის ძმათა სასაფლაოზე ომის გამოძიების აუცილებლობაზე საუბრობს და ირწმუნება, რომ ომი არა 7, არამედ 8 აგვისტოს, ქართული მხარის სპეკულაციური ნაბიჯებიდან გამომდინარე დაიწყო.

ჩვენი პოლიტიკური ოპონენტები ამ თარიღს აღნიშნავდნენ წლების განმავლობაში 8 აგვისტოს და რამდენიმე წლის შემდეგ გადაწყვიტეს, რომ ომი თურმე 7 აგვისტოს დაწყებულა. ეს არის სპეკულაციები, რომელსაც არ აქვს საფუძველი. ერთადერთი მიზანია, რომ გახლიჩონ ამ ყველაფერშიც საზოგადოება. არაფერი არ უნდა აერთიანებდეს ქართულ საზოგადოებას. "ნაცმოძრაობამ" ხელი მოაწერა ევროსაბჭოს რეზოლუციას, რომლის თანახმადაც მათ დაიწყეს აგვისტოს ომი. გარდა ამისა, თქვენ იცით, რომ ამ პოზიციას ეთანხმება ნაცმოძრაობის პრეზიდენტი, სალომე ზურაბიშვილი. ნაცმოძრაობის გზავნილები და რუსეთის ხელისუფლების გზავნილები ემთხვევა ერთმანეთს. ორივემ თქვა, რომ 2008 წელს ომი დაიწყო სააკაშვილის ხელისუფლებამ. სამართლებრივი ფორმა შეიძლება იყოს სხვადასხვა, ეს შეიძლება იყოს პროკურატურისთვის მიმართვა, საკონსტიტუციო სასამართლოსთვის მიმართვა. ამ ყველაფერზე საზოგადოება მიიღებს ინფორმაციას, მაგრამ მთავარი არის ის, რომ 2008 წლის დანაშაული, რომელიც ჩაიდინა სააკაშვილის ხელისუფლებამ, იყოს ბოლომდე გამოძიებული", - ამბობს კობახიძე.
აგვისტოს ომიდან 16 წელი გავიდა - 2008 წლის აგვისტოში რუსეთის ფედერაცია, საერთაშორისო სამართლის დარღვევით შემოიჭრა საქართველოს ტერიტორიაზე, შელახა საქართველოს სუვერენიტეტი, ჩაიდინა ომის დანაშაულები და დანაშაულები კაცობრიობის წინააღმდეგ, რასაც, მათ შორის, მშვიდობიანი მოქალაქეების სიცოცხლის მოსპობა და 26,888 ადამიანის (9,081 ოჯახის) იძულებითი გადაადგილება მოჰყვა.

მიუხედავად ამისა, საქართველოს მთავრობა და რუსეთი 2008 წლის ომის დაწყებას კვლავინდებურად, 8 აგვისტოს აღნიშნავენ.

რუსეთის ფედერაციის მხრიდან მოყენებული ზიანი განგრძობადია. კვლავ პრობლემურია ოკუპირებულ ტერიტორიებზე მცხოვრები ადამიანების უფლებრივი მდგომარეობა და ეთნიკური ქართველების შევიწროება. ამასთან, პრობლემად რჩება მცოცავი ოკუპაცია, უკანონო ე.წ. ბორდერიზაცია და საოკუპაციო ხაზის მახლობლად მცხოვრებ პირთა უსაფრთხოებასთან დაკავშირებული გამოწვევები.

საოკუპაციო რეჟიმმა კიდევ უფრო დაამძიმა ე.წ. საზღვრის უკანონო კვეთისთვის პირთა დაკავებების უკანონო პრაქტიკა, რაც გრძელვადიანი უკანონო პატიმრობის შემთხვევების გახშირებაში გამოიხატება.