"ყველგან არის ეს, მაგრამ ჩვენ ჭყონდიდში ვხედავთ ამ პრობლემას რამდენადაც ის გამწვავდა" - მეუფე გრიგოლი

,,ერთი სიტყვით, მძიმე სურათი არის და ვფიქრობ, რომ ალბათ თვით ჭყონდიდელ მიტროპოლიტსაც არ მოსწონს რაც ხდება" - ასე ეხმაურება ფოთის მიტროპოლიტი, მეუფე გრიგოლი ჭყონდიდის ეპარქიაში დღეს 7 ნოემბერს განვითარებულ მოვლენებს.

მეუფე გრიგოლის განცხადებით, ჭყონდიდის ეპარქიაში ძალიან მძიმე ვითარებაა, თუმცა აქედან გამოსავალი ჭყონდიდის მიტროპოლიტმა, მეუფე სტეფანემ უნდა მოძებნოს და როგორც ჩანს ამ გამოსავალს ის საკუთარ გადაწყვეტილებაში ხედავს. 

,,ერთი სიტყვით, მძიმე სურათი არის და ვფიქრობ, რომ ალბათ თვით ჭყონდიდელ მიტროპოლიტსაც არ მოსწონს რაც ხდება. თუმცა, ის გამოსავალს იმ გადაწყვეტილებებში ხედავს, რომელსაც ღებულობს. საერთოდ უნდა გითხრათ, ეკლესიის წიაღში, მღვდელმთავრებშიც, სხვადასხვა საკითხებზე არსებობს განსხვავებული აზრები, მაგრამ ჩვენ ამაზე საჯაროდ არ ვსაუბრობთ და სხვა სივრცეში განვიხილავთ. ისე უნდა გითხრათ, რომ ეკლესია რამდენადაც ცოცხალი ორგანიზმია, პრობლემები უცხო არ არის. ჩვენც გვაქვს გავლილი, არა ზუსტად მსგავსი, მაგრამ ზოგადად სერიოზული პრობლემები გვქონდა ჩვენც და დიდი ხანი არის გასული , 25 წელია გასული. იგივე ახალციხეშიც შეიქმნა პრობლემები, ესეც დიდი ხანია უკვე. ყველგან არის ეს, მაგრამ ჩვენ ჭყონდიდში ვხედავთ ამ პრობლემას რამდენადაც ის გამწვავდა, რატომ გამწვავდა ამას ვერ გეტყვით. ერთი რამ შემიძლია ვთქვა, მეც იმდენივე ვიცი, რაც ზოგადად თქვენ, ტელევიზიებიდან მესმის“, - განაცხადა მეუფე გრიგოლმა. 

შეგახსენებთ, სალხინოს მონასტერში დღეს რამდენიმე ადამიანი, მათ შორის სასულიერო პირიც დააკავეს, მას შემდეგ რაც მათ ეკლესიაში სალოცავად შესვლის უფლება არ მიეცათ.