"რუსულმა ტყვიამ ვერ შეგვაშინა და არც მათი დამპალი სასამართლოს შიში არ მექნება" - უკრაინაში მებრძოლი ქართველი ლაშა რუხაია

ოთხ ქართველ მებრძოლს მოსკოვმა პატიმრობა მიუსაჯა. რუსულმა სასამართლომ უკრაინაში მებრძოლი ქართული ლეგიონის წარმომადგენლები რუსეთის სისხლის სამართლის კოდექსით გაასამართლა და როგორც დაქირავებული მებრძოლები რუსული არმიის წინააღმდეგ საბრძოლო მოქმედებებში მონაწილეობაში დაადანაშაულა.

რეაქცია რუსული სასამართლოს გადაწყვეტილებაზე ფაქტობრივად ნულოვანია - ქართველ მებრძოლებს არ აღელვებთ მოსკოვში მიღებული გადაწყვეტილება. მაგრამ ისინი არ გამორიცხავენ, რომ საქართველოს ხელისუფლებამ კრემლთან ითანამშრომლოს და მებრძოლებს პროვოკაციები მოუწყოს.

"არ არის გამორიცხული ამ ხალხზე, ვისზეც რუსეთმა სასჯელი გამოუტანა ამ პრორუსმა ხელისუფლებამ ჩვენმა, რამე პროვოკაცია მოგვიწყოს. ამის გამო ვისჯები (აჩვენებს მედალს) ეს არის უკრაინაში რომ დამაჯილდოვეს და მე ამაყი ვარ ამით. ორ ომს გადავურჩი, რუსულმა ტყვიამ ვერ შეგვაშინა და არც მათი დამპალი სასამართლოს შიში არ მექნება, თავაწეული ვივლი ყოველთვის", - თქვა ლაშა რუხაიამ.

"ქართული ლეგიონის" მეთაური, მამუკა მამულაშვილი ამბობს, რომ ახლა ამწვავებენ სიტუაციას მათთან დაკავშირებით, რადგან ლეგიონი ძალიან მასშტაბური გახდა და რუსეთის სპეცსამსახურების დიდ ყურადღებას იქცევს. მამულაშვილი ამბობს, რომ მის წინააღმდეგ რუსეთში 8 საქმეა აღძრული.

"ლაპარაკი იმაზე, რომ ვიღაც დაგვიჭერს, ზედმეტია, ადამიანები არიან აქ ჩამოსული საომრად, თავი აქვთ გადადებული, თუმცა არის საშიშროება, კიბატონო, არცერთ მებრძოლს არ უნდა ტყვედ ჩააბაროს საკუთარმა მთავრობამ რუსეთს", - ამბობს ის.