"თუ დავიბრუნებთ ჩვენს გუნდურ სულისკვეთებას, კვლავ რთული მეტოქეები ვიქნებით ოპონენტებისთვის - ეს წარმატების ერთადერთი გზაა“ - ვილი სანიოლი ნორვეგიასთან მატჩის წინ

სპორტი 1694486700

ვილი სანიოლი

საქართველოს ნაკრების მწვრთნელმა, ვილი სანიოლმა ნორვეგიასთან მოახლოებულ ევრო 2024-ის შესარჩევი მატჩამდე „ულევაალის“ სტადიონზე გამართულ პრესკონფერენციაზე ისაუბრა და განაცხადა, რომ მისი გუნდი ოსლოში ესპანეთთან მიღებული შოკიდან გამოსვლას შეეცდება.

პარასკევს საქართველოს ნაკრები თბილისში ესპანეთთან სახლში 7:1 დამარცხდა. „ჯვაროსნების“ მწვრთნელმა დღევანდელ პრესკონფერენციაზე ამის შესახებ ემოციურად ისაუბრა.

„ესპანეთთან თამაშზე საუბარი რთულია. ეს ჩვენი მხრიდან სრული კატასტროფა იყო. დავმარცხდით და ამ მატჩში დავკარგეთ ყველაფერი, რამაც გასული ორი წლის განმავლობაში ძლიერ გუნდად გვაქცია. არ გვქონდა დისციპლინა, ბრძოლისუნარიანობა, გუნდური სულისკვეთება და შეტევაში აგრესიულობა. შეცდომები იყო თამაშის გეგმაშიც და ეს ჩემი პასუხისმგებლობაა.

შესაძლოა, ესპანეთთან ოთხმცველიან ტაქტიკაზე გადასვლა არ იყო მართებული და ზედმეტად ამბიციური გადაწყვეტილება გამოდგა. ფეხბურთი სწორედ ამიტომ არის შესანიშნავი სპორტი, რომ წარმატების შემდეგ, ყოველთვისაა შემდეგი მატჩი, სადაც უნდა დაამტკიცო შენი შესაძლებლობები. როდესაც გაქვს დიდი იმედგაცრუება, როგორც ეს ესპანეთთან მოხდა, შემდეგ თამაშზე უნდა შეძლო ფოკუსირება.

ბოლო ორი დღის განმავლობაში ასეთი წაგების მიზეზების დასადგენად ფეხბურთელებთან ბევრი ვისაუბრეთ. ჩემთვის, ესპანეთთან მომხდარი არ იყო შემთხვევითობა. ეს ბოლო თვეების განმავლობაში დაგროვებული მცირე დეტალების შედეგია. ფეხბურთი არასდროს გაპატიებს, თუ 100 პროცენტს არ გაიღებ და დაგსჯის ამის გამო. შევთანხმდით იმაზე, თუ რა უნდა ვაჩვენოთ ნორვეგიის წინააღმდეგ და დარწმუნებული ვარ, „ულევალიზე“ ნორვეგია სრულიად განსხვავებული საქართველოს ნაკრებს იხილავს.

უკმაყოფილო ვარ ბოლო 2-3 თამაშით, გასული ორი წლის განმავლობაში კი, ძალიან ბედნიერი ვიყავი. თუმცა ეს ნორმალურია. ფეხბურთში არის სირთულეები და ჩვენი საქმეა, გამოსავალი ყოველთვის ვიპოვოთ. ესპანეთთან მარცხი, რა თქმად უნდა, ძალიან მტკივნეული იყო, არა მხოლოდ ჩემთვის და ფეხბურთელებისთვის, არამედ მთელი ქვეყნისთვის. ეს აღარ უნდა განმეორდეს.

ვფიქრობ, რომ ნორვეგიასთან მატჩი შანსია ჩვენთვის. ახლა უნდა ვაჩვენოთ ყველაფერი, რაც სამი დღის წინ ვერ შევძელით. მჯერა, რომ ჩემი ფეხბურთელები ამას გააკეთებენ. თუ დავიბრუნებთ ჩვენს გუნდურ სულისკვეთებას, კვლავ რთული მეტოქეები ვიქნებით ოპონენტებისთვის. ეს წარმატების ერთადერთი გზაა.

ბათუმში ერლინგ ჰალანდი ტრავმის გამო არ ჩამოვიდა. ამჯერად ის მზად არის. როგორ ვაპირებთ მის შეჩერებას? არ ვიცი, რადგან აღარ ვთამაშობ. ამაზე შემეძლო 20-25 წლის წინ მეპასუხა. მიხარია, რომ ჩემი ფეხბურთელები ჰალანდს შეხვდებიან. ის მსოფლიოში ერთ-ერთი საუკეთესო მოთამაშეა, თუ არა საუკეთესო თავდამსხმელი. ფეხბურთელები მისით აღფრთოვანებულები არიან“, – განაცხადა 46 წლის ფრანგმა სპეციალისტმა.

საფრანგეთის ნაკრების (58 მატჩი) ყოფილ მოთამაშეს შეკითხვა დაუსვეს ნორვეგიის ნაკრების ექს-მცველ ჯონ არნე რიისეზე, რომელთან ერთადაც „მონაკოში“ ათასწლეულის მიჯნაზე თამაშობდა. რიისე მარცხენა მცველი იყო, სანიოლი კი სამეფოს გუნდის მარჯვენა მცველი. სანიოლს აშკარად მოეწონა კითხვა და ყოფილ თანაგუნდელზე თბილად ისაუბრა.

„სამწუხაროდ, დიდი ხანია არ გვქონია ურთიერთობა. დასანანია, რადგან „მონაკოში“ საკმაოდ ახლო მეგობრები ვიყავით. ორივე ახალგაზრდა ვიყავით. მას სულ თვალს ვადევნებდი, რიისეს ფანტასტიკური კარიერა ჰქონდა. დიდი მებრძოლი იყო და მასთან თამაში მომწონდა. ალბათ ახლა სადმე ახლოსაა. ერთი მესიჯი გვინდა და კიდევ ერთხელ სიამოვნებით შევხვდებით“.

ნორვეგიის და საქართველოს ეროვნული ნაკრებების შეხვედრა 12 სექტემბერს, თბილისის დროით 22:45 საათზე დაიწყება.

მასალის გამოყენების პირობები
სხვა სიახლეები
სალომე ზურაბიშვილი
"გამარჯვება ბიჭებო" - პრეზიდენტი ეროვნულ ნაკრებს

"გამარჯვება ბიჭებო" - ამ სიტყვებით ამხნევებს დორტმუნდში ჩასული პრეზიდენტი სალომე ზურაბიშვილი ეროვნული ნაკრების ფეხბურთელებს.   დორტმუნდის სტადიონზე თბილისის დროით 20:00 საათზე საქართველო:თურქეთის თამა...

საზოგადოება 1718722917

აშშ ელჩი
„რატომ უნდა გააღრმაო ეკონომიკური კავშირი პარტიასთან, ვინც აფინანსებს ოკუპანტს?“ - აშშ-ის ელჩი ჩინეთზე

რაც შეეხება ანაკლიას, CCCC კომპანიის უმეტესი ნაწილის მფლობელი, რომელთანაც საქართველოს მთავრობამ კონტრაქტი დადო, ჩინეთის კომუნისტური პარტიაა და ის ცნობილია, რომ დაკავშირებულია ჩინეთის არმიასთან. ჩინეთი...

პოლიტიკა 1718722846

საქართველოში აშშ-ის ახალი ელჩი რობინ დანიგანი
„რთულია ძლიერი პარტნიორობის გაგრძელება, თუ ხელისუფლება მტრად განგვიხილავს“ - დანიგანი

უკანასკნელი დღეების განმავლობაში საქართველოს ხელისუფლების წარმომადგენლები და მათ შორის პრემიერმინისტრი აცხადებენ, რომ იმედი აქვთ ჩვენი ურთიერთობის ძველ რელსებზე დაბრუნების. მაგრამ ჩვენ ასევე ძალიან მკ...

პოლიტიკა 1718722744

შოთაძე
"კანდიდატი არსებობს" - ვინ შეცვლის ირაკლი შოთაძეს

ვინ აღმოჩნდება ირაკლი შოთაძის ადგილმონაცვლე? - მთავარი საგამოძიებო უწყება ქვეყნის პირველი გამომძიებლის გარეშე მას შემდეგ დარჩა, რაც შოთაძემ თანამდებობა მოულოდნელად დატოვა.   "პირველები" შეეცადა, გაერკ...

პოლიტიკა 1718719430

ჩერგოლეიშვილი
„ასეთ ოლქში შევედით პატრიარქის, ზვიადის და მიშას მტრებად შერაცხული „ელჭიპიტი იეღოვლები“ ბიძინასთან საჭიდაოდ“ – რას იხსენებს თამარ ჩერგოლეიშვილი

„ევროპული საქართველოს“ წევრი, თამარ ჩერგოლეიშვილი სოციალურ ქსელში წერს: „გრძელი პოსტია, მაგრამ ძალიან მინდოდა დამეწერა.გუშინ ერთ გონიერ ადამიანს შევხვდი და მასთან საუბრითაა ინსპირირებული. (ამის მერე ფ...

სოცმედია 1718719090

თემირლან
"ხელახალი გამოძიების ჩატარება ვერ იქნება გონივრული" - სპეციალური საგამოძიებო სამსახური მაჩალიკაშვილის საქმეზე

 სპეციალური საგამოძიებო სამსახური ეხმაურება 2024 წლის მარტში ევროპის მინისტრთა კომიტეტის მიერ გაცემულ რეკომენდაციას "მაჩალიკაშვილი და სხვები საქართველოს წინააღმდეგ" საქმესთან დაკავშირებით. უწყება ამბო...

სამართალი 1718718939