ვილი სანიოლმა კვიპროსსა და შოტლანდიასთან მატჩებში საქართველოს ნაკრების შემადგენლობა დაასახელა

საქართველოს ნაკრების მთავარმა მწვრთნელმა ვილი სანიოლმა ის შემადგენლობა დაასახელა, ვინც ევროპის ჩემპიონატის საკვალიფიკაციო ეტაპზე ითამაშებს. შეგახსენებთ, რომ საქართველოს ნაკრები 17 ივნისს კვიპროსს, 20 ივნისს კი შოტლანდიას ესტუმრება.

სანიოლის გუნდში ერთი დებიუტანტია - "პერსეპოლისის" 32 წლის მცველი გიორგი გველესიანი, რომელმაც ახლახან ირანის ჩემპიონატსა და თასზე გამარჯვება იზეიმა. გარკვეული პაუზის შემდეგ ეროვნულ გუნდს უბრუნდებიან აპოელ-ის თავდამსხმელი გიორგი ქვილითაია, "შტურმის" ნახევარმცველი ოთარ კიტეიშვილი და "პანეტოლიკოსის" გარემარბი ლევან შენგელია.

სანიოლის სიაში ამჯერად ვერ მოხვდა მოსკოვის "დინამოს" მცველი საბა საზონოვი. სავარაუდოდ, 21 წლის ფეხბურთელი საქართველოს ახალგაზრდულ ნაკრებს დაეხმარება, რომელიც ივნისში ევროპის ჩემპიონატზე მასპინძლის სტატუსით ითამაშებს. ეროვნულის შემადგენლობიდან 21-წლამდელებში სხვა ფეხბურთელებიც გადაინაცვლებენ.

მეკარეები - გიორგი ლორია (ანორთოსისი), გიორგი მამარდაშვილი (ვალენსია), ლუკა გუგეშაშვილი (ყარაბაღი)

მცველები - გურამ კაშია (სლოვანი), საბა კვერკველია (ნეფთჩი), ოთარ კაკაბაძე (კრაკოვია), ლუკა ლოჩოშვილი (კრემონეზე), გიორგი გველესიანი (პერსეპოლისი), ლაშა დვალი (აპოელ), ჯიმი ტაბიძე (დინამო თბ), ირაკლი აზაროვი (ცრვენა ზვეზდა), გიორგი გოჩოლეიშვილი (შახტარი)

ნახევარმცველები - ნიკა კვეკვესკირი (ლეხი), ოთარ კიტეიშვილი (შტურმი), ვლადიმერ მამუჩაშვილი (დინამო ბთ), სანდრო ალთუნაშვილი (დინამო ბათუმი), ლევან შენგელია (პანეტოლიკოსი), ლუკა გაგნიძე (დინამო მ), საბა ლობჟანიძე (ქარაგიუმრუქი), გიორგი ჩაკვეტაძე (სლოვანი), ზურიკო დავითაშვილი (ბორდო), ხვიჩა კვარაცხელია (ნაპოლი).

თავდამსხმელები: გიორგი მიქაუტაძე (მეცი), ბუდუ ზივზივაძე (კარლსრუე), გიორგი ქვილითაია (აპოელ).